🚨ब्रेकिंग न्यूज चंद्रपूरकडे जाताना भीषण अपघात; महिला पोलिस कॉन्स्टेबल विशाखा बनसोड यांचा दुर्दैवी मृत्यू

दिनांक १७/०८/२०२६ बीएस न्यूज नेटवर्क मुल संपादक, प्रतिनिधी गणेश गेडाम चंद्रपूर येथे उजळणी कोर्स साठी ड्युटीवर जात असलेल्या महिला पोलिस कॉन्स्टेबल विशाखा बनसोड यांचा चंद्रपूर महामार्गावरील वलनी-बोडी नजीक झालेल्या भीषण अपघातात दुर्दैवी मृत्यू झाला. या घटनेने पोलिस विभागासह सावली, तळोधी आणि परिसरात शोककळा पसरली आहे.मिळालेल्या माहितीनुसार, विशाखा बनसोड या तळोधी पोलिस स्टेशनमध्ये कार्यरत होत्या. त्या आज सकाळच्या सुमारास चंद्रपूरच्या दिशेने जात असताना वलनी-बोडी नजीक त्यांच्या कारचा भीषण अपघात झाला. अपघाताची तीव्रता एवढी होती की कारचा मोठ्या प्रमाणात चक्काचूर झाला. या दुर्घटनेत विशाखा बनसोड यांचा दुर्दैवी मृत्यू झाला.विशाखा बनसोड या यापूर्वी सावली पोलिस स्टेशनमध्ये कार्यरत होत्या. काही दिवसांपूर्वीच त्यांची तळोधी पोलिस स्टेशनमध्ये बदली झाली होती. आठवडाभरापूर्वी त्या नव्या ठिकाणी रुजू झाल्या होत्या. अतिशय चांगल्या स्वभावाच्या आणि सहकाऱ्यांमध्ये आपुलकीचे संबंध असलेल्या विशाखा बनसोड यांच्या आकस्मिक निधनाने पोलिस विभागातील सहकाऱ्यांनाही मोठा धक्का बसला आहे.सदर अपघाताची माहिती मिळताच परिसरात खळबळ उडाली. अपघात नेमका कोणत्या कारणामुळे झाला, याचा तपास सुरू असून दुर्घटने मागील नेमके कारण तपासानंतर स्पष्ट होणार आहे.या दुर्दैवी घटनेने तळोधी पोलिस स्टेशन, सावली परिसर आणि संपूर्ण पोलिस विभागात दुःखाचे वातावरण निर्माण झाले आहे. विशाखा बनसोड यांच्या निधनाबद्दल सहकारी, मित्रपरिवार आणि नागरिकांकडून हळहळ व्यक्त करण्यात येत आहे.भावपूर्ण श्रद्धांजली!