🚨💥🚨राजकीय दबावापुढे एसटीची शरणागती?ट्रॅव्हल्स मालकाच्या बाजूने राजकीय ताकद पणाला; मूल–नागपूरच्या सर्व फेऱ्या बंद, ‘हप्त्या’च्या आरोपांनी खळबळ

बीएस न्यूज नेटवर्क मुल संपादक गणेश गेडाम मूल : खासगी ट्रॅव्हल्स मालकाच्या दबावापुढे परिवहन विभागाने शरणागती पत्करली असून, मूल–नागपूर एसटीच्या सर्व फेऱ्या बंद करण्यामागे आर्थिक आणि राजकीय हितसंबंधांचा खेळ असल्याचा गंभीर आरोप होत आहे. मूल शहरातील एका बड्या राजकीय नेत्याला संबंधित ट्रॅव्हल्स मालकाकडून नियमितपणे लाखो रुपयांचा ‘हप्ता’ मिळत असल्याची चर्चा असून, या कथित आर्थिक व्यवहाराच्या मोबदल्यात संबंधित नेत्याने आपली राजकीय ताकद ट्रॅव्हल्स मालकाच्या बाजूने लावून एसटीच्या मूल–नागपूर फेऱ्या सुरू होऊ नयेत यासाठी परिवहन विभागावर दबाव आणल्याचा आरोप केला जात आहे. इतकेच नव्हे तर परिवहन विभागातील काही बड्या अधिकाऱ्यांपर्यंतही खासगी ट्रॅव्हल्सकडून नियमित ‘हप्ता’ पोहोचत असल्याचा दावा विश्वसनीय सूत्रांकडून केला जात आहे. त्यामुळे एसटी प्रशासन खासगी ट्रॅव्हल्स समोर झुकले आहे की काय, असा संतप्त सवाल मूलकरांकडून उपस्थित होत आहे. या सर्व आरोपांची स्वतंत्र अधिकृत पुष्टी झालेली नसली तरी, मूल–नागपूर सारख्या महत्त्वाच्या मार्गावरील सरकारी बससेवा बंद होण्यामागील निर्णय प्रक्रियेची निष्पक्ष चौकशी करण्याची मागणी आता जोर धरत आहे.

उल्लेखनीय म्हणजे, मुल परिवहन विभागाच्या एसटी स्टँड समोरच मुल नागपूर ट्रॅव्हल्स उभ्या राहत आहे.एकेकाळी पहाटे साडे सहा वाजल्यापासून मूल–नागपूर बससेवा सुरू असायची. सकाळची बस पकडून व्यापारी, शासकीय कामासाठी जाणारे नागरिक, विद्यार्थी आणि ग्रामीण भागातील प्रवासी नागपूर गाठत होते. पूर्वी दर अर्ध्या ते एका तासाने या मार्गावर बस उपलब्ध असल्याचे प्रवाशांचे म्हणणे आहे. दिवसभरात मूल–नागपूर आणि नागपूर–मूल अशा जवळपास दहा ते पंधरा फेऱ्या होत असल्याने या मार्गावर सातत्याने प्रवाशांची गर्दी असायची. मात्र काही खासगी ट्रॅव्हल्स सुरू झाल्यानंतर एसटीच्या फेऱ्या कमी होत गेल्या आणि अखेर मूल–नागपूर थेट बससेवाच बंद झाल्याने खासगी वाहतुकीला मोकळे मैदान मिळाल्याचा आरोप होत आहे.विशेष म्हणजे मूल बसस्थानकावरून धावणाऱ्या इतर एसटी बसेसमध्ये प्रवाशांची गर्दी असताना फक्त मूल–नागपूर मार्गावर प्रवासी मिळत नाहीत, असे कोणत्या आधारावर ठरवण्यात आले? हा प्रश्न आता नागरिक विचारत आहेत. जर या मार्गावर प्रवासी संख्या अपुरी होती, तर एसटी महामंडळाने त्यासंदर्भातील अधिकृत आकडेवारी जाहीर करावी. पूर्वी या मार्गावर मोठ्या प्रमाणात प्रवासी प्रवास करत असताना अचानक सेवा बंद होण्यामागे नेमके कारण काय, याचे उत्तर प्रशासनाने देणे आवश्यक आहे.एसटी सेवा बंद झाल्याचा सर्वाधिक फटका महिला, ज्येष्ठ नागरिक, दिव्यांग आणि विद्यार्थ्यांना बसत आहे. सवलतीच्या दरात नागपूरला जाण्याची सुविधा एसटीमुळे उपलब्ध होती. आता खासगी ट्रॅव्हल्सचा महागडा पर्याय स्वीकारण्याशिवाय अनेक प्रवाशांसमोर पर्याय उरलेला नाही. त्यामुळे सर्वसामान्यांच्या सोयीसाठी असलेली सरकारी बससेवा बंद आणि खासगी ट्रॅव्हल्सचा व्यवसाय सुरू—हा नेमका योगायोग आहे की नियोजनबद्ध निर्णय? असा सवाल उपस्थित केला जात आहे.आणखी काही दिवसांपूर्वी चंद्रपूर–उमरेडमार्गे नागपूर अशी दुपारी अडीच वाजताची बससेवाही उपलब्ध होती. मात्र तीदेखील बंद झाल्याचे सांगितले जात असून, खासगी ट्रॅव्हल्सच्या दबावामुळे ही सेवा बंद करण्यात आल्याचा आरोप होत आहे. त्यामुळे मूल–नागपूर मार्गावरील एसटी सेवा बंद होण्याच्या निर्णयाकडे आता केवळ प्रशासकीय निर्णय म्हणून न पाहता त्यामागील संभाव्य आर्थिक आणि राजकीय हितसंबंधांची चौकशी करण्याची मागणी होत आहे.दरम्यान, ट्रॅव्हल्स मालकाकडून राजकीय नेत्याला लाखो रुपयांचा हप्ता आणि परिवहन विभागातील बड्या अधिकाऱ्यांपर्यंत नियमित आर्थिक व्यवहार होत असल्याचे आरोप जर खरे असतील, तर हा प्रकार अत्यंत गंभीर आहे. या आरोपांची चौकशी करण्याची आणि संबंधित आर्थिक व्यवहारांची सत्यता तपासण्याची मागणी नागरिकांकडून केली जात आहे. दुसरीकडे हे आरोप खोटे असतील तर संबंधितांनी त्यांचे स्पष्ट खंडन करून मूल–नागपूर बससेवा बंद करण्यामागील अधिकृत कारण जनतेसमोर मांडावे, अशीही अपेक्षा व्यक्त होत आहे.